Rev 3 | MHL | STEP | “Opora fain ensel Sardis owowa sios wia urufiya nain siisimoma, ‘Fain Mua Maneka opora-ke, eena ewar ikur okaiwi-pa erup wiar ikua ne mokoma ikur okaiwi-pa erup opap ikua nain. Aria ni sira kamenap oniman nain yo niar amisarem. Ni mokok enuma ikeman nia naimik-na wia, ni iiriw umeman.

Revelation of John 3

Opora fain wi Sardis wia sesekomak

1 “Opora fain ensel Sardis owowa sios wia urufiya nain siisimoma, ‘Fain Mua Maneka opora-ke, eena ewar ikur okaiwi-pa erup wiar ikua ne mokoma ikur okaiwi-pa erup opap ikua nain. Aria ni sira kamenap oniman nain yo niar amisarem. Ni mokok enuma ikeman nia naimik-na wia, ni iiriw umeman. 2 Yo uuwowa niar furewiyem nain ni pepek me oniman, ne yena Auwa pun niar urufap naap nia mainon. Naapeya ni iikirap uuwowa niar orekam naep oniya nain nainiw iikiroweka. 3 Ni nainiw kema aaweka, ni opora iiriw miimaman nain kekanep opap kema kireka. Ni me iikirowen-na yo ikum mua saarik ekapemi nia soranowap-puinen, ne yo ekapiyem fofa nain me efa amisarowen.

4 Ne ni Sardis teeria mua kuisow kuisow eliwa, wiena mia suuwowa me tuminarowamik. Wi efamiya ikowa nain pepek, naapeya wi ikoka mia suuwowa kia suuwap yena efamiya soomarikuan. 5 Aria, miiw unowa wi kekanep nomakimik nain ikoka mia suuwowa kia naap nain suuwikuan. Ne pun wiena unuma parosifa-pa wiar ikua nain me wiar iirarinen. Naeya wi Mua Maneka wameiya anane eliwa ikaikuan. Ne yena Auwa ne ona ensel mokoka-pa ariman feenap wia mainen, “Wi nain yena teeria-ke.” 6 Ni ifan onaiya ikok-na Ewar Eliwa-ke wi sios wia maakiya nain wiar miimeka!’”

Opora fain wi Filadelfia wia sesekomak

7 “Opora fain ensel wi Filadelfia sios wia urufiya nain feenap siisimoma, ‘Opora fain mua unumiya eliw oram ne makena, mua nain opora-ke. Dewit koor omopora os-ke urufiya. O omopora paaskinon-na mua oko upowa me pepek, ne upinon-na mua oko paaskowa me pepek. 8 Feenap maek, ni uuwowa oniman nain yo niar amisarem. Urufeka, yo omopora nia paaskap-puomam, ne mua oko upekam naep oninon-na me pepek. Moram, yo fain niar amisarem, makena, ni kekanowa manek marew, nain nia samoriwkin yo opora yookap baliwep opiman ne kekanep o me amisaremik, naap me efa maiman. 9 Wi Satan tepak-pa ikok wiam fiirimimik nain Yuuda-ke wiam naimik, nain wi teeria nain ikoka wia poromkun ni miir onoma-pa keema muuna mikikuan. Keema muuna mikap maikuan, “Aa pepek, Yeesus nia kookalek,” naap maikuan. 10 Ni kekanep opora efar opam-ikok yoowa aawem-ikeka nia maakem nain ookam-ikaiman. Naapeya ikoka miiw unowa wia akimowa maneka imenariya nain yena nia urufam-ikemkun ni akimowa me niar imenarinon.

11 Yo epa me ekowa ekapinen. Ni opora ookam-ikeman nain kekanep naap ookam-ikeka, naeya ikoka nomakow maa bala maneka niiyem nain niar iirarowa me pepek. 12 Wi mua akimowa nomakimik nain ikoka yena Auwa tempel koora poka saarik wia wuamkun kiiriw nainiw me piipuikuan. Ne yena Auwa unuma wi mia-pa wiar siisimemi Yerusalem owow enuma unuma pun mia-pa wiar siisiminen. Owow enuma eena Mua Maneka-ke iinan-pa sesekeya orowa nain. Ne yena unum enuma pun o mia-pa wiar siisiminen. 13 Ni ifan onaiya ikok-na Ewar Eliwa wi sios wia maakiya nain miimeka!’”

Opora fain wi Laodisia wia sesekomak

14 “Opora fain ensel eena wi Laodisia sios wia urufiya nain siisimoma, ‘Opora fain mua makena kekanep ikaiya nain ona opora-ke. O mua opor makena aakuniya. Mua Maneka iiriw maa muutitik onak nain onoma os. 15 Opora feenap nia maek, ni yo yookiman nain sira niar amisarem. Ni me efa piipuaman, nain ni me senam yook-afuriman. Naeya yo kamenap nia oninen! 16 Ni kema garia. Naapeya ikoka maa samorareya keesimik naap nia keesinen. 17 Ni feenap niam maiman, i maa unowa akena yiar ikua, i maa pepek, maa kuisow-ko me iiwaremik. Ni naap niam maiman nain feenap me niam furewiman. Ni mua oorpowa, maa marew akena-ke, ni kua-pa areman, mia saporma ne mokok opa ikeman, nain me niam furewiman. 18 Naapeya ni feenap oneka naep nia maakiyem, niena maa unowa nain aawep yo maa eliwa gol eena tumin marewa nain efar sesenarowen-na ni maa unow onaiya ikowen. Mia suuwowa kia efar sesenarep saporma ikeman nain niam wakesimeka, naeya emina me ururowen. Ne pun marasin efar sesenarep mokoka-pa wuap sariarep maa eliw urufowen.

19 Yo wi teeria wia kookaliyem nain ifana wiaremi sira wia ofakowiyem. Ni aakisa ifana baliwep wuap kema kireka. 20 Ni miimeka! Yo omopora-pa iimarep ikok anumiyem, o mua yo iwakara efar miimap omopora paaskominon-na kemena ikiwep wameiya maa eniminen. Ne os pun naap, yo efamiya maa eniminon. 21 Wi teeria akimowa wiar imenareya kekanep nomakimik nain yo efamiya pokap ikok miiw unowa fain urufikuan, yo nomakep Auwa wameiya pokap ikok miiwa urufiyem naap. 22 Ni ifan onaiya ikok-na Ewar Eliwa wi sios wia maakiya nain wiar miimeka!’”